Жыць для Беларусі

bahuslava @ 2009-09-05T21:31:00

2009-09-05T18:40:28Z

***
няма нічога звыш,
проста эра майго "назаўжды"
зьмянілася эраю "болей ніколі",
а вечнае расставаньне памерла,
і гэта фінальны круг...
і няўрымсьлівы боль
проста выйшаў з сваіх берагоў
і змывае усе перашкоды на ўласным шляху.
проста "быць з табой"
шчэ ня значыла перамагчы адзіноту
проста вечныя вера, надзея
і здраджаная любоў
моўчкі туляцца на краі сэрца,
і нічога звыш
не існуе.

***

2008-10-19T18:50:30Z

На палімпсэсьце
тваёй памяці і сэрца
я напішу сваё імя
і нашае каханьне
нязмыўным, незабыўным
колерам сьвятла.
Я акрыяю пад тваім крылом,
я ахаваю ад усіх хістаньняў
наш цёплы і прытульны дом,
дабраславеньне
даўняга спатканьня.

*

2008-06-15T11:03:45Z

Я нітку лёсу скручваю ў клубок былога.
Усё жыцьцё - вялікі шлях да Бога.

***

2008-06-08T13:17:00Z

Безь цябе дзервянее сэрца.
Мне цяпер павяртацца зноў
да шляхоў усіх крозаў-сноў,
каб наноў атуляцца сэнсам...
Каб вышукваць адбіткі твае
ў пацямнелых вачох нябёсаў...
Ўсё адно: я дзякую лёсу
за найчысты, найкрашшы сьвет.
Разьвінаюцца крылы болю —
хоць палётам душу напатолю...

*

2008-05-18T20:13:49Z

Я буду пасьля
пасьлядоўна ісьці да мэты,
спакваля
выпраўляць твае хібы...
Я буду ласкавай ды хітрай,
я буду нібыта зямля
багатай ды небам спавітай
я буду пасьля...

Анягож мне аддаць свае крылы,
сарваўшы, пусьціць пялёскі
па ветры?..
Павер, ты - сіла
пасьлядоўна ісьці да мэты...

bahuslava @ 2008-02-20T23:22:00

2008-02-20T21:23:27Z

Веры ды вернасьці
бракуе майму часу,
маёй Сучаснасьці.

***

2008-01-12T15:56:25Z

Разьвязаць вузельчыкі былога,
Адпусьціць Харонаў човен прэч,
Запыніцца на мяжы парога,
Каб пасьпець адкінуць далеч з плеч.

Адцьвітаньне памяці няўдзячнай
Майго сэрца хай не закране.
Ўсё міне. І ціхіх слоў нязначнасьць
Абарвецца у адвечным сьне...

Я прыйду на захад пакланіцца,
Там, дзе сонца хіліцца маё...
Разьвітацца... Боскаму скарыцца...
То ня сьмерць - то Вечнае Жыцьцё.

Зінаіда Гіпіюс

2007-12-01T20:35:57Z

  Ісьціна ці шчасьце?
                           В.К.
 Вам страшна за мяне - а мне за вас.
Ды розны страх мы адчуваем.
 Хоць летуценьні й блізкія у нас,-
Шкадуем розным шкадаваньнем.

 "Па-чалавечы" вам шкада мяне.
Цяжкі ды горкі шлях шуканьняў!
 Бязвогненнай дарогі, ціхай мне
Жадалі б вы - бяз болю, без хістаньняў.

 Але "па-Боску" вас шкадую я.
Каго люблю - люблю для Бога.
 І тым сьвятлейшая мая душа,
Чым палымнейшай ёсьць дарога.

 Вам ціхага прыстанку не хачу,
Так лёгка да самоты ўпасьці;
 Я не пра шчасьце вашае прашу -
Пра тое, што вышэй за шчасьце.

Пераклад з расейскай

Леташні верш

2007-11-12T21:56:24Z

Летась восень была раньняй ды доўгай, нібыта бясконцай... Узгадала пра тое, калі знайшла недапісаны свой верш, якому, відаць, наканавана застацца недапісаным...

***
Тая восень была несьмяротнай,
шэравокай ды апантанай -
нарадзілася ўлетку і -
ніколі не памірала.
Спруцянеўшы, рыпелі пачуцьці,
я ружанец зь іх пальцамі трушчыў
і між змроку намацваў вокам
ніткі колішняга сьвятла...
Сьвет заблытаўся, сьвет заблукаў
у сумётах апалай лістоты...

***

2007-11-11T10:23:17Z

Стану на раздарожжы,
на скрыжаваньні ўсіх вятроў,
дзе горкі смак зьлюцелай адзіноты
зьнішчае ўсе кляйноты
й пячаткі шчасьця
на збалелых сэрцах...
Зірну паўз вочы на душу
Стваральца Лёсу
і зразумею:
ня менш, чым я,
Ён прагне й не знаходзіць тут любові...

я твой рай

2007-11-05T09:24:24Z

я
твой
рай
я твой страчаны рай

Салюты

2007-09-23T16:33:56Z

Я не люблю салютаў, я не люблю, калі страляюць і плююць на Неба...

***

2007-09-20T10:10:25Z

Я чытаю праўду
на дне тваіх зрэнак,
я зьдзімаю пыл
з прамінулых вёрстаў,
я здымаю хмары
з замерзлых нябёсаў:
я іду да цябе...

***

2007-08-27T09:00:20Z

Вырай кліча
ў нязнаную далеч
паднябесься,
й Вы, як ветразь
аддаяцеся
на волю чужых вятроў...
Ляцеце.
Ваш шлях дамоў,
па крузе правёўшы Вас,
верне.
Павяртайцеся. Я чакаю.

Raźvitańnie z byłym

2007-08-13T06:47:47Z

Listotaj žoŭtaj
asypajucca
tvaje listy staryja
ŭ moj śmietnik.
Vahoń sahreje jich
niachaj.
A ja pisać nanova raspačnu
svoj šlach —
ź vialikaj litary j čyrvonaha
na biełym arkušy
radka.

Клецкая бітва 6 жніўня 1506 года

2007-08-06T20:04:22Z

А сёньня, дарэчы, угодкі перамогі пад Клецкам!!! Мо, крыху запозьнена, але віншую ўсіх са сьвятам!
Жыве Беларусь!!!

Culpa...

2007-07-31T19:35:17Z

Сваю душу між камянёў зацісну,
змалю ў муку і,
рашчыніўшы у жывой вадзе,
зраблю зь яе аплатку
для цябе:
даруй ласкава.

Stareńki vieršyk

2007-07-11T09:00:41Z

Ciša. Ciša.
Nia ludzi - myšy.
Trapiečuć dušy -
jich strachi mučać.
Nia Dom - dziržava,
nia Kraj - achviara...
Jašče žyvaja,
Ziamla kanaje...
Miž miortvaj cišy
Eoły śviščuć.
Tut ludzi-myšy
Radzimu niščać...

:)

2007-06-28T20:08:20Z

Баюся долу.
Вышыні?
Глядзець уверх
нястрашна.

(Вера Паўлава, расейская паэтка)

Насамрэч гэты верш пра мову:)

2007-06-08T13:38:30Z

***
Гаворыш: "Люблю…" –
Ня веру табе, не прымаю.
Я мару тваю спалю,
я выльлю любоў на зямлю,
бо жывiць i бо ажыўляе.
I крыльлем цябе акраплю,
i сэрца тваё вазьму,
i выпраўлю
ўсе
“люблю”
твае
на свае
“кахаю”.

***

2007-05-23T11:27:01Z

Ты выцягваў вонкі
душу з абалонкі
недарэчнага цела,
што ў безмацы млела.

Прамаўляў вачыма
адкрыта а шчыра,
нібы імкнучыся
людзкосьці зрачыся.

Разгортваў прастору
ад мора да мора,
сьмяяўся зь бясчасься
і быў маім шчасьцем…

А потым закутаўся ночай,
атуліў душу, ды збочыў,
і ляснуўшы долу, мовіў:
«Жыві як раней… ці як хочаш…»

манаверш

2007-05-22T17:15:35Z

Быць душой, а ня душным целам.

bahuslava @ 2007-02-27T15:16:00

2007-02-27T13:18:13Z

***
Сонца ёсьць,
нат калi яго доўга ня бачна.
I Неба – побач
заўсёды,
паўсюль.
Яно шмат лепшае за зямлю
апiрышча для стомленых ног,
бо ў Iм – у жывой душы –
жыве Усямоцны Бог.

bahuslava @ 2007-02-01T19:24:00

2007-02-01T16:47:14Z

Усіх вітаю!!! Вось нарэшце стварыла сваю старонку. Дзякую тым, хто спрычыніўся да гэтага.) Шчыра дзякую Валярыне)